ლევან მემანიშვილი დღეს ბოლნისში სამხედრო პატივით დაკრძალეს

ნანახია: 38
სრული ინფორმაცია

აფხაზეთის კონფლიქტის შედეგად დაღუპული მეომარი ლევან მემანიშვილი დღეს ბოლნისში სამხედრო პატივით დაკრძალეს

შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატისა და წითელი ჯვრის საერთაშორისო კომიტეტის ძალისხმევით, 1992-1993 წლებში აფხაზეთის შეიარაღებული კონფლიქტის შედეგად დაღუპული ბოლნისელი მებრძოლის, ვახტანგ გორგასლის II ხარისხის ორდენის მფლობელი სამხედროს, ლევან მემანიშვილის ნეშტის იდენტიფიცირება გახდა შესაძლებელი.

დაღუპული მეომრის ოჯახის გადაწყვეტილებით, ლევან მემანიშვილის ნეშტი, მის მშობლიურ ქალაქ ბოლნისში, სამხედრო პატივით დაიკრაძალა.

ლევან მემანიშვილის ნეშტის დაკრძალვამდე სამოქალაქო პანაშვიდი სასაფლაოს მიმდებარედ არსებულ ღვთისმშობლის სახელობის ტაძარში გაიმართა, სადაც ბოლნელმა მთავარ ეპისკოპოსმა ეფრემმა სამხედროს სულის მოსახსენიებელი პანაშვიდი გადაიხადა.

აფხაზეთში დაღუპულ მეომარს ბოლნისელებთან ერთად პატივი ბოლნისის მუნიციპალიტეტის მერმა დავით შერაზადიშვილმა და ბოლნისის, დმანისის, თეთრიწყაროსა და წალკის დეპუტატმა გოგი მეშველიანმა მიაგეს.
იმ ადგილას, სადაც დღეს ლევან მემანიშვილი დაიკრძალა, ბოლნისის მუნიციპალიტეტის გადაწყვეტილებით, უახლოეს მომავალში ძმათა სასაფლაო და მემორიალი მოეწყობა.

აღსანიშნავია, რომ ლევან მემანიშვილის გარდა, საქართველოს მთავრობისა და წითელი ჯვრის საერთაშორისო კომიტეტის ძალისხმევით, 1992-1993 წლების შეიარაღებული კონფლიქტის შედეგად, უგზო-უკვლოდ დაკარგული კიდევ 12 პირის იდენტიფიცირება მოხერხდა. ოკუპირებული აფხზეთიდან გადმოსვენებული პირების სამოქალაქო პანაშვიდი 23 აპრილს სამების საკათედრო ტაძარში გაიმართა.

„აფხაზეთის ომმა არაერთი ბოლნისელის სიცოცხლე შეიწირა, მათ შორის ჩემი უახლოესი მეგობრების, ამიტომ ეს დღე ჩემთვის განსაკუთრებით ემოციური და სიმბოლურია. 14 უგზო-უკვლოდ დაკარგული ბოლნისელი მებრძოლიდან საქართველოს მთავრობისა და წითელი ჯვრის საერთაშორისო კომიტეტის ძალისხმევით, ჯერ მხოლოდ ლევან მემანიშვილის ნეშტის იდენტიფიცირება მოხერხდა. დღეს ჩვენი გმირი თანამემამულე მის მშობლიურ ქალაქში, სამხედრო პატივით დავკრძალეთ,სადაც უახლოეს მომავალში ძმათა სასაფლაო და მემორიალი მოეწყობა. ეს დღე ტკივილიანი და ამავე დროს სასიხარულოცაა, რადგან ჩვენ, თითოეულ ბოლნისელს საშუალება გვაქვს ლევანს დამსახურებული პატივი მივაგოთ. იმედი მაქვს, რომ უგზო-უკვლოდ დაკარგული გმირების იდენტიფიცირება აქტიურად გაგრძელდება. ჩვენი მოვალეობაა არასდროს დავივიწყოთ საქართველოს ტერიტორიული ერთიანობისა და თავისუფლებისთვის დაღუპული გმირები. მჯერა, მათი თავგანწირვა შედეგს აუცილებლად გამოიღებს და ერთ დღესაც, ყველანი ერთად, ერთიან და განვითარებულ საქართველოში ვიცხოვრებთ“, - განაცხადა ბოლნისის მუნიციპალიტეტის მერმა დავით შერაზადიშვილმა.


    მოცემული ვებ გვერდი Global Fund For Women -ის მიერ დაფინანსებული პროგრამის " ქალები ცვლილებებისთვის- ქალები, რომლებიც მხარს უჭერენ ქალთა, გოგონათა და ტრანს ადამიანების უფლებებს, კულტურას, რელიგას, კონსერვატიზმს, ფუნდამენტალიზმსა და სამოქალაქო საზოგადოების სივრცის შექმნას რეგიონში." პროგრამა რეგიონში ქვემო ქართლის ქალთა ასოციაციამ ,,ქალი და სამყარო" განახორციელა.

ქალთა რადიო ვივი (Women and the World) შექმნილია ქვემო ქართლის ქალთა ასოციაცია ,,ქალი და სამყაროს" მიერ Global Fund For the Women-ის მიერ დაფინანსებული პროგრამის " ქალები ცვლილებებისთვის- ქალები, რომლებიც მხარს უჭერენ ქალთა, გოგონათა და ტრანს ადამიანების უფლებებს, კულტურას, რელიგას, კონსერვატიზმს, ფუნდამენტალიზმსა და სამოქალაქო საზოგადოების სივრცის შექმნას რეგიონში."