სრული ინფორმაცია

აშშ-ის პრეზიდენტმა დონალდ ტრამპმა გაეროს გენერალურ ასამბლეაზე სიტყვით გამოსვლისას გაიმეორა შვიდი ომის დასრულების შესახებ განცხადება და აღნიშნა, რომ მას არასდროს მიუღია დახმარება გაეროსგან.

მან ჩამოთვალა კონფლიქტები სომხეთსა და აზერბაიჯანს; კამბოჯასა და ტაილანდს; ისრაელსა და ირანს; ინდოეთსა და პაკისტანს; რუანდასა და კონგოს დემოკრატიულ რესპუბლიკას; ეგვიპტესა და ეთიოპიას; სერბეთსა და კოსოვოს შორის.

ტრამპმა გამოსვლაში ისაუბრა ნობელის მშვიდობის პრემიის მიღების სურვილზე და განაცხადა, რომ „ყველა“ ფიქრობს, რომ ის ამას იმსახურებს.

პრეზიდენტმა განაცხადა, რომ გაერომ არ სცადა მისი ძალისხმევის დახმარება.

„მე დავასრულე შვიდი ომი, ვითანამშრომლე თითოეული ამ ქვეყნის ლიდერთან და გაეროს მხრიდან კი სატელეფონო ზარიც კი არ მიმიღია, რომელიც შეთანხმების დასრულებაში დახმარებას შემომთავაზებდა“, - აღნიშნა მან და დასძინა: „გაეროსგან მხოლოდ ესკალატორი მივიღე, რომელიც ასვლისას შუაში ჩერდებოდა.. შემდეგ კი სუფლიორი, რომელიც არ მუშაობდა“.

მან დასვა კითხვა, რა არის გაეროს მიზანი?

„ასე რომ, რა არის გაერთიანებული ერების ორგანიზაციის მიზანი? გაეროს უზარმაზარი პოტენციალი აქვს“, - განაცხადა მან და დაამატა, „მაგრამ ის ამ პოტენციალის რეალიზებასთან ახლოსაც კი არ მიდის“.

„ცარიელი სიტყვები ომს ვერ წყვეტს“, - განაცხადა ტრამპმა.