სრული ინფორმაცია

საქართველოს პროკურატურამ ტელეკომპანია მთავარი არხის ჟურნალისტის და ოპერატორის დევნის ფაქტზე ორ პირს ბრალდება წარუდგინა.

"სპეციალური საგამოძიებო სამსახურის მიერ ჩატარებული გამოძიებით დადგინდა, რომ 25 ივლისს, ტელეკომპანია მთავარი არხის ჟურნალისტი და ოპერატორი სიუჟეტის მოსამზადებლად ლანჩხუთის მუნიციპალიტეტის სოფელ სუფსაში იმყოფებოდნენ, რა დროსაც ტელეკომპანიის და ჟურნალისტების პროფესიული საქმიანობის მიმართ ნეგატიურად განწყობილი ორი პირი მივიდა მათთან და სხვადასხვა სახის შეურაცხმყოფელი შეძახილით ჟურნალისტისგან ტერიტორიის დატოვებას მოითხოვდნენ.

ბრალდებულებმა ჟურნალისტს ფიზიკური შეურაცხყოფა მიაყენეს." - წერია განცხადებაში.

პროკურატურის ცნობით, სპეციალური საგამოძიებო სამსახურის თანამშრომლებმა ორივე ბრალდებული 26 ივლისს დააკავეს. დაკავებულებს ბრალდება საქართველოს სისხლის სამართლის კოდექსის 156-ე მუხლის მე-2 ნაწილის "ა" ქვეპუნქტით (ადამიანის დევნა მის პროფესიულ მოღვაწეობასთან დაკავშირებით, ჩადენილი ძალადობით) წარედგინათ, რაც სასჯელის სახედ და ზომად 3 წლამდე თავისუფლების აღკვეთას ითვალისწინებს.

"პროკურატურა ბრალდებულებისთვის აღკვეთის ღონისძიების შეფარდების შუამდგომლობით, სასამართლოს კანონით დადგენილ ვადაში მიმართავს." - წერია განცხადებაში.

ტელეკომპანია მთავარის ჟურნალისტსა და ოპერატორს 25 ივლისს პროფესიული საქმიანობის შესრულების დროს თავს დაესხნენ.

• მთავარი არხი: ჩვენს ჟურნალისტსა და ოპერატორს ოცნების ტიტუშკები თავს დაესხნენ

26 ივლისს ჟურნალისტსა და ოპერატორზე ძალადობის ფაქტზე ორი ადამიანი დააკავეს.

ფოტო: მთავარი არხი