სრული ინფორმაცია

აკაურთა შერეული - ქართველებით, სომხებით და აზერბაიჯანელებით დასახლებული სოფელია, ხატისოფელში კი მხოლოდ ქართველები ცხოვრობენ. ორივე სოფელი ბოლნისიდან რამდენიმე კილომეტრში მდებარეობს.

აკაურთაში დილით ჩავედით, თუმცა სოფელი დიდი ხნის გაღვიძებული დაგვხვდა. სოფლებში ასეა, ადრე დგებიან. მოულოდნელად ჩასულ უცხო ადამიანებს ცნობისმოყვარეობით გვაკვირდებიან. ჩვენს მანქანას თვალს აყოლებენ. ზოგი ეჭვით გვათვალიერებს, ზოგი ინტერესს არ მალავს, რა გვინდა, საიდან ვართ, „მთავრობიდან ვართ“ თუ „ვისიანები ვართ“ და იქ რატომ აღმოვჩნდით.

ზოგი თავს გვარიდებს და ვიდეოკამერების დანახვაზე სწრაფად უხვევს სოფლის რომელიმე შესახვევში, „ტელევიზორში გამოჩენა არ უნდა“. ზოგიც პირიქით, ჩერდება, კამერას არ უშინდება და არც ლაპარაკს უფრთხის.

აკაურთის მთავარ ქუჩაზე ორი აზერბაიჯანელი ქალი გვხვდება. როცა იგებენ, რომ გვაინტერესებს ამ სოფლის პრობლემები და ხალხის განწყობები, ლაპარაკს თავად იწყებენ.

ამ ორიდან ერთი ქალი სოფლის მთავარ, გადაუჭრელ პრობლემას, უწყლობას უჩივის:

„ერთი დღე ჩემთან მოდის წყალი, მეორე დღეს სხვასთან, მერე ზეგ ისევ ჩემთან მოვა და ასე“, - წყლის პრობლემა სოფელს თითქმის 30 წელია აქვს და აკაურთა, ბოლნისის სოფლებს შორის, ამ მხრივ, გამონაკლისი არ არის.

აკაურთაში სულ დარეგისტრირებული იყო 855 ამომრჩეველი. არჩევნებზე მივიდა 378 და „ქართულ ოცნებას“ ხმა მისცა 353-მა ადამიანმა. ხატისოფელში კი ერთიან საარჩევნო სიაში იყო 308 ადამიანი. არჩევნებზე მივიდა 206 და „ქართულ ოცნებას“ ხმა მისცა 161-მა ამომრჩეველმა.

საუბარში მეორე ქალიც ერთვება. მას ის აწუხებს, რომ ბავშვის ბაღში წასაყვანად დაქირავებულ მძღოლს თვეში 100 ლარი უნდა გადაუხადოს. აკაურთაში საბავშვო ბაღი არ არის. ცალკე სახელმწიფო სამარშრუტო სოფლის ბავშვებს არ ემსახურება, ამიტომ ოჯახებს თავად უწევთ მგზავრობის ფულის გადახდა.

როცა პოლიტიკაზე, პოლიტიკოსებზე, ჩავლილ არჩევნებზე ვუსვამთ კითხვას, გვეუბნებიან, რომ „ყველაფერი კარგადაა“ და გვშორდებიან.

რადიო თავისუფლების რეპორტაჟი ბოლნისიდან, უფრო ვრცლად ნახეთ აქ : https://www.radiotavisupleba.ge/a/33212128.html