სრული ინფორმაცია

„ევროპის წამლის სააგენტომ“ (EMA) AstraZeneca-ს კორონავირუსის საწინააღმდეგო ვაქცინის თაობაზე წინასწარი მოკვლევის შედეგები გამოაქვეყნა.

როგორც დღეს გავრცელებულ განცხადებაშია ნათქვამი, სააგენტოს შესაბამისმა კომიტეტმა დაადგინა:

1.ვაქცინის სარგებელი კორონავირუსის ფართოდ გავრცელებულ საფრთხესთან ბრძოლაში კვლავ აჭარბებს გვერდითი ეფექტების რისკს.
2. ვაქცინა არ არის დაკავშირებული ვაქცინირებულ პაციენტებში სისხლის კოლტების საერთო რისკების (თრომბოემბოლური მოვლენების) ზრდასთან.
3. არ არსებობს ვაქცინის კონკრეტულ პარტიასთან ან მწარმოებელ ქარხანასთან დაკავშირებით პრობლემის მტკიცებულება.
4. ამის მიუხედავად, ვაქცინა შეიძლება დაკავშირებული იყოს თრომბოციტოპენიასთან ასოცირებულ თრომბების წარმოქმნის ძალიან იშვიათ შემთხვევებთან, ანუ თრომბოციტების დაბალ დონესთან.

„ეს იშვიათი შემთხვევებია - დიდ ბრიტანეთში და ევროპულ ეკონომიკურ ზონაში დაახოლებით 20 მილიონი ადამიანი აიცრა 16 მარტის მდგომარეობით და EMA-ს მიერ გაანალიზდა სისხლძარღვებში თრომბების წარმოქმნის მხოლოდ 7 და ცერებრალური ვენური სინუსის თრომბოზის (CVST) 18 შემთხვევა. ვაქცინასთან მიზეზ-შედეგობრივი კავშირი დადასტურებული არ არის, მაგრამ შესაძლებელია და შემდგომ ანალიზს იმსახურებს“, - ნათქვამია წამლის სააგენტოს განცხადებაში.

მოკვლევა „ევროპის წამლის სააგენტოს“ იმ კომიტეტმა ჩაატარა, რომლებიც მედიკამენტების უსაფრთხოების საკითხების შეფასებაზეა პასუხისმგებელი. მანამდე, სააგენტოს წარმომადგენლებმა პრესკონფერენციაზე განაცხადეს, რომ კორონავირუსის საწინააღმდეგო Oxford/AstraZeneca-ს ვაქცინა „უსაფრთხო და ეფექტურია“.

როგორც BBC წერს, ევროკავშირის მედიკამენტების მარეგულირებელმა ორგანომ დაადგინა, რომ ვაქცინა ”არ ასოცირდება” თრომბის მაღალ რისკთან, თუმცა ის ვაქცინასა და სისხლის შედედების იშვიათ შემთხვევებს შორის შესაძლო კავშირის შესწავლას განაგრძობს.

„ეს არის უსაფრთხო და ეფექტური ვაქცინა. მისი სარგებელი კორონავირუსის წინააღმდეგ ადამიანების დაცვის მხრივ აჭარბებს შესალო რისკებს“, - განაცხადა სააგენტოს აღმასრულებელმა დირექტორმა ემერ ქუქმა პრესკონფერენციაზე.

წყარო: BBC